伊健恭喜GiGi有咗
[轉載/Youtube] 香港影視展前日喺會展揭幕，由于仁泰執導、鄭伊健、林峯同鄭少秋主演嘅新片《忠烈楊家將》噚日喺影視展搞宣傳活動，呢部戲將會喺9月推出，伊健演楊大郎，因為拍呢部戲，佢喺北京幾乎住咗三個月，佢話：「初時都幾驚，因為內地有太多假食物，後來先知大家嘅助手都識煮嘢，咁自己煮食，梗係比較放心。」拍電影期間，伊健覺得最辛苦係騎馬，因之前唔識騎馬，所以開工前喺內地練習咗成個月。問伊健前女友梁詠琪（GiGi）係咪有咗，佢話：「我哋已經好少聯絡，所以唔知真定假，如果係真就恭喜佢。」
林峯好打獲讚
秋官成10年冇拍戲，今次接拍呢部戲，喺戲入面演楊令公，佢笑笑口話：「原本撞晒期接唔到，後來聽佢講完古仔，我就同老婆商量，盡量迫啲期出嚟拍啦！導演講古仔真係好叻。」
于仁泰噚日講，搵秋官拍呢部戲係因為大家都係老餅，比較傾得埋，另外佢又讚林峯拍打戲好精采，最初諗唔到佢拍打戲咁勁喎！
