東西宮鬥氣 幕後一肚氣 敏之甩場 法拉玩遲到
[轉載/Youtube] 無綫劇《東西宮略》中夏迎春陳敏之與鍾無艷陳法拉鬥個你死我活，原來熒幕下兩人亦面和心不和。據悉敏之拍攝《東》劇期間經常度期接job惹法拉不滿，觸怒法拉向劇組篤背脊，踢爆敏之開工甩場，二人戲裏戲外均鬥餐飽。早前有指陳法拉與陳敏之去年拍攝無綫劇集《東西宮略》期間，法拉扮大牌和教敏之演戲而傳不和。然而，記者卻獲悉兩女不和原因，其實是敏之經常向劇組度期接外面工作有關。
據悉，敏之開拍《東》劇期間頻頻向劇組度期請假搵真銀，被打亂工作的法拉極度不滿，多次向劇組投訴。有次敏之又再向劇組度期接job，並揚言會於晚上11時趕返來開工，法拉忍不住向劇組篤敏之背脊說：「佢唔返㗎喎！」意指敏之將會甩場。敏之獲悉後勁㷫，與法拉開工時刻意玩遲到，但法拉亦不甘示弱一於鬥遲。
宣傳扮老友
儘管近日法拉與敏之出席宣傳活動時扮老友，但上周三兩人到商台接受訪問後，有人聽到法拉向無綫詐型說：「點解唔搵我同安仔（郭晉安）一齊出嚟呀？點解係佢（敏之）呀？」
記者前日致電《東》劇監製黃偉聲，問敏之是否經常度期？他說：「每個演員都有度期，成個製作過程咁長，唔通唔畀佢做出邊嘢搵吓錢咩？」問到法拉是否為此不滿？他稱：「佢冇直接同我講過，但有聽PA（助導）講過，rundown調動，法拉個戲好重，有時PA度咗啲嘢畀佢，個妝轉嚟轉去冇得休息，法拉會要求跳拍，或者話：『唔拍啦，我返去休息。』有調動，演員唔開心都好正常。」法拉是否曾踢爆敏之甩場？他說：「冇親耳聽到，但聽PA提過。兩個都咁重戲咁辛苦，爭取時間休息，難免有時你遲吓我遲吓。」
對於法拉不滿自己經常度期，敏之昨回應：「咁搞笑？應該唔會，大家係好朋友，基本上度期大家都知道，每個人都有度期，呢啲傳聞啫。」而法拉昨笑着回應說：「東西宮係不和㗎喎！個個演員都有度期㗎啦，好正常啫，我哋冇不和。」
