狼船泊岸 你跳我上
[轉載/Youtube] 「中國影帝」溫家寶總理前日聖旨一出，政界認定阿爺挺狼。血狼嘅地獄班底快將成形，煲呔嘅夕陽班子家陣就各懷鬼胎，好多高官諗定7.1跳船，亦有人賴死唔走，部署棄曾投狼。八方同某官員講開最新嘅官場形勢，佢話前日同班高官坐埋睇新聞，見到有人分析溫影帝嘅講話其實係挺狼，有人就衝口而出話：「大X鑊！」有官場中人同八方講，雖然隻狼講明想現任班子留任，但係除咗林公公仲想賴死做政務司司長外，其他人都係十五十六。據聞已經為特區「鞠躬盡瘁」嘅孫公，好大機會跳船，以免為狼捐軀。hea到爆嘅保安局局長李少光係時候走，而林鄭月娥同鄭汝樺「兩個只能活一個」，即係最少一個會鬆人。
葉劉北上 戰意旺盛
林鄭噚日出席完立法會會議後，俾記者追問佢想做隻狼嘅CS定FS？即時臉黑走人，睇怕佢未必會埋狼堆。八方聽聞有立定決心拜拜嘅高官，早排已私下同政界中人講，今年7.1之後就會離開香港。佢唔係怕隻狼怕到要「着草」，係plan好咗放自己大假，離開香港去旅行兼冇眼睇！
有人諗住跳船，但政壇抽濕機葉劉就戰意旺盛，自誇可勝任狼營CS，噚日就自爆兩會期間上過北京，睇過京劇同見過朋友，但又唔肯透露詳情喎，真係京港兩哋嘅水都俾佢抽乾！有網友仲快手到喺Facebook整咗個非官方版「特首辦」，學晒政府出新聞稿，話保安局長劉夢熊博士介紹了三合會社團嘅貢獻；教育局局長羅范椒芬叫老師唔想要國民教育就應該走開，等網民及早體驗狼營「無間地獄」降臨。
