BB大得快 等唔切六月生 千嬅龍仔蓄勢搶閘
[轉載/Youtube]預產期六月的楊千嬅近期已全面安胎等生，直認是嚴厲老公的丁子高（Real），前晚在活動上透露囝囝大得好快，頭仔又大，可能搶閘早產出世。龍B樣樣要爭，將為人父的他不惜打人情牌撲床位，又自爆怕血淋淋，未ready親手為囝囝剪臍帶，要上網狂煲生仔片做準備。楊千嬅陀的第一胎男嬰，肚皮一直比其他孕婦大，腹大便便又心野的她，在老公丁子高管束下，全面休息，等待小生命來臨。丁子高就密密工作賺奶粉錢，他前晚在圓方出席意國品牌Max & co.春裝活動，一提到囝囝就難掩興奮心情，他說：「醫生話阿仔大得好快，好足磅，而且手長腳長，個頭都特別大，可能會比預計早出世。」
老公撲床位
丁子高原本已經搵定兩間醫院讓老婆生B，但由於醫院規定孕婦要足夠周期才能入院，如果囝囝搶閘出世，他就要四出找朋友幫忙，打人情牌即時撲床位。據悉千嬅己有床位，會在養和醫院生。
Real又指醫生提議他親手為囝囝剪臍帶，但他就依然猶豫不決，有點手足無措，他說：「我一定會陪老婆入產房，拖住佢隻手，望住佢對眼支持佢，但係剪臍帶，望落好似係內臟咁，我就未ready好，家要上網睇定啲生仔片，做定心理準備。如果我接受到個畫面，都會拍埋片，始終呢個係應該紀念的時刻。」他又透露千嬅亦有點緊張，因為囝囝愈來愈重，亦強烈感受到小生命在腹中郁動的感覺。
老婆學格價
準備迎接新生命的楊千樺，就在微博自嘲變成格價師奶：「這兩星期瘋狂shopping，其實我很喜歡hea街，但這次是有所不同，買之前要做research，夾價（格價），慢慢變成另外一個丁生，為迎接新生命準備！今天可以休息一下。」
