G.E.M.剷青報天氣忍唔住笑
GEM 鄧紫棋 天氣報告 2012.3.22
[轉載/Youtube] aTV 本港台 晚上6:57 天氣報告 - 鄧紫棋(G.E.M) - 2012年3月22日天氣女郎: 鄧紫棋(G.E.M)
「今日相對濕度介乎喺百分之六十八……」鄧紫棋（G.E.M.）報天氣？仲要係亞視嚟嘅？唔通佢想同黃婉曼鬥過？唔好以為係惡搞圖，G.E.M.報天氣千真萬確，可惜亞視捉到鹿都唔識脫角，一啲宣傳（或者有）都唔見，搞到G.E.M.噚日下午要喺微博公告天下：「今晚六點半請留意ATV亞洲電視本港台的新聞報道。不要問，只要看。」
微博報定料
好唔容易等到6點55分，只見G.E.M.一身OL裝，個頭仲剷咗青，一臉認真報天氣，但佢忍唔住笑，又忘記咗「報天氣打出心口是常識吧」嘅真理，好彩臨尾整番個「G.E.M. close」，高登仔嗌收貨啦。馮仁昭打電話畀G.E.M.了解，佢助手話：「公司由上個月開始，每個月會幫佢接一份歌手以外嘅工作，類似秘撈。上個月就賣生果，今個月就報天氣。」
之後馮仁昭聯絡到G.E.M.本人，問佢事前點解冇宣傳，佢話：「我哋就係唔想畀人知，要大家突然睇到我報天氣，我好滿意表現，畀自己九分，因為喉嚨痛扣咗一分，哈哈！」
G.E.M.話做天氣女郎係好唔間單：「化妝整頭都要自己搞掂，之後要試位，然後收天文台資訊，即刻打字寫對白，我打得太慢，要工作人員幫手。」
G.E.M.話天氣報告係喺播出前15分鐘錄影，時間好趕，佢NG咗一次，第二次就一take過，佢仲講到自己個剷青頭：「成為香港有史以嚟第一位剷青天氣女郎。」
係咪要挑戰黃婉曼？G.E.M.話：「冇可能，我拍馬都追唔到。」G.E.M.又否認要忍笑，因為佢覺得報天氣要正經。
剪髮迎新歌
另外，G.E.M.日前接受商台訪問，宣傳佢首新歌《Someday I'll Fly》，問到佢首歌題材消極，係咪關於男友林宥嘉，皆因盛傳佢兩個分手，G.E.M.只係話：「會包括感情事，而剪剷青頭最大意義係反映生命，生命似有好多受損頭髮，受傷時會做電髮染髮，企圖遮住傷口，但一洗頭就會發現開晒叉，生命嘅傷口要好番係要面對同接受。」
