香港搞成咁 桃姐：點住人？
[轉載/Youtube] 小圈子豬狼困獸鬥，全城花生友睇得津津有味，但係影后葉德嫻就越睇越火滾。Deanie姐噚日接受商台節目訪問，暢談叫好又叫座嘅《桃姐》之餘，仲講到特首戰。言談之間，Deanie對香港嘅未來非常心淡。Deanie話好留意特首選舉，以「豬豬哋」形容選情。Deanie講得好隱晦，言語間似乎驚住香港人選出一個壞人做特首：「我覺得香港人對政治呢，甚至係中國人，係不談政治㗎嘛。呢樣嘢培養之下呢，我哋對政治係好白癡嘅。我哋都係喺度學習緊，所以出錯係會嘅。」
大部份香港人冇份投票選特首，只能笑住欣賞豬狼互插。但係Deanie就話特首選情已經影響咗佢嘅心情，似乎好不滿隻豬為保聲譽不惜犧牲老婆，佢話：「我覺得有陣時為自己嘅利益，好多時都會出賣咗好多人，甚至你自己愛嘅人都會，呢個係人性嘅一面。」不過Deanie強調唔係捧狼：「唔係，我完全冇咁嘅意思。」
正如人大常委范太話齋，無論豬狼邊隻跑出，香港和諧社會都有隱憂。Deanie話：「我哋將來香港點樣行落去？希望唔好淨係成為人哋一個shopping mall咁，我哋已經唔creative㗎喇，又唔productive，咁點算呢？」
Deanie越講越，指香港已經唔適合人住：「我有奉勸我一啲朋友個仔嘅，我話呢個地方不宜久留㗎喇。你哋應該盡量將所有嘅刀磨利佢，去一個地方可以安居樂業。因為呢個地方已經唔係可以畀你咁樣坐喺度，好勤力咁樣去做嘢，就可以畀你安居。」
點解人變得越來越自私
「你諗吓，衣食住行，住好緊要㗎。你住嘅地方，家仲住埋呢啲劏房，有火警走唔到，乜嘢地方嚟㗎呢度係！點解人變得越來越自私呀？點解咁呀？點解人亦都變得越來越逆來順受呀？呢個世界除咗香港，冇第二啲地方喇咩？係有嘅，去一啲留人處嘅地方。呢個地方唔係留人嘅，呢個地方係有錢佬住㗎。」
