而我不知許曉暉先生是誰?
[轉載/Youtube]條街盛傳振英哥新設嘅文化局局長一職，會由「冇文化」背景嘅民政事務局副局長許曉暉升呢掌舵。許曉暉喺文化界算老幾？喺噚日新光戲院重開典禮上，八方乘機問吓演藝界人士意見，十居其九都唔知許曉暉係乜水。樂壇一姐謝安琪稱呼佢做「許先生」、家英哥叫佢做「許婉暉」。唔通佢哋想表達「而我不知許曉暉是誰」？八方噚日問阿Kay對未來文化局有乜期望，阿Kay話對邊個做局長都冇意見，最緊要落力推動本地文化，希望未來局長正視表演場地不足問題，又話如果局長對文化有深厚認識就更好。八方追問許曉暉係唔係合適人選，點知阿Kay竟然話：「我唔係好悉識許先生」，搞到在場行家個個忍笑。
阿Kay做完訪問仲賣口乖，話覺得俾港聞版訪問好有趣。阿Kay後來問大家點解咁好笑？有記者話佢知其實許曉暉係女人。阿Kay當堂知衰，叫記者唔好寫佢講錯嘢囉。阿Kay又唔使怕醜嘅，只怪「許先生」知名度太低啦。
