內地電檢禁春嬌腿張開
[轉載/Youtube] 馮仁昭唔係想挑起中港兩地紛爭，只係以事論事！講嘅係喺中、港兩地上映、由彭浩翔執導嘅《春嬌與志明》，除咗陀地春嬌姐（楊千嬅飾）鬥贏北姑尚優優（楊冪飾）之外，仲有一樣嘢係香港贏晒嘅，咪係電檢制度囉！近年內地廣電總局不時發功，好似最近上映嘅《鐵達尼號3D》，你估觀眾真係想睇3D冰山咩？最令人期待梗係琦溫絲莉立體呈現嘅露點戲啦！點知嗰兩點俾廣電總局狠狠剪走，諗起都痛！而少少鹹、多多趣嘅《春嬌》，又成為廣電總局箭靶。
粗口照出
喺內地上映嘅《春嬌》，其中一幕講徐崢演嘅光頭中坑，幫春嬌喺屎坑執番部手機，又買部新機送畀佢。春嬌死黨Isabel就叫春嬌以身相許，仲爆咗句「腿張開」，但呢句啜核對白竟被河蟹變成「躺下來」，層次低咗幾個呢。但係「嗰條臭X叫你春嬌姐」同「死X緊」呢啲性器官粗口就原汁原味奉上，唔通廣電總局班人聽唔明廣東話？
另外，彭浩翔噚日接受商台電話訪問，提到余文樂版《別問我是誰》MV爆紅，佢話當初樂仔知道要拍，第一個反應就係「X！」又埋怨拍咁鬼耐，到家先知彭導有遠見。彭導又話《春嬌》衝破三千萬票房，就會拍番個自己嘅版本，家陣票房已經二千幾，睇嚟大家又有新MV睇！
