法拉、敏之 夾錢慶功泯恩仇
[轉載/Youtube] 陳法拉同陳敏之演嗰套《東西宮略》啱啱星期日播大結局，成班演員因為各有工作，當晚都冇約出嚟睇，但前日知道結局收視最高有40點，法拉同敏之即刻吹雞，約咗呂慧儀、阮小儀、何傲芝、黃智賢同艾威等去尖沙嘴打邊爐慶祝，仲玩到凌晨一點幾。望再拍喜劇
之前傳過法拉同敏之不和，法拉噚日就喺電話度話可能係啲觀眾太投入東、西宮呢兩個角色，佢話同敏之私下其實好好感情，經常有見面，所以佢哋一知道《東》劇結局收視好，就即刻商量一齊夾錢請大家打邊爐慶祝。
原來法拉拍呢個劇時好有壓力，因為鍾無艷個角色好經典，咁難得八點半劇集有最高40點成績，總算令佢放下心頭大石。法拉話：「成班同事合作得好開心，劇本又寫得好，好希望呢個班底再拍喜劇再開心過。」而郭晉安同阮兆祥前日唔得閒去慶祝，法拉話會等齊人再正式慶祝多一次。
法拉開心，敏之就更興奮，因為今次係佢首次擔正做主角，所以好緊張個成績，家收視咁好，佢覺得好似派咗成績表知道自己攞咗A咁開心，敏之都希望再同法拉一齊開工。
