《盛女》不堪輿論壓力 紛紛著草走人
小儀做性女誘男人
Eason踩 Fans其貌不揚
[轉載/Youtube] 無綫節目《盛女愛作戰》掀全城熱話，五位「盛女」卻終於不堪輿論壓力，如鳥獸散避見人兼唔返工！至於兩位星級「剩女」容祖兒與阮小儀卻態度積極，對「前景」信心十足！身家逾億元的天后容祖兒現年31歲，雖年初曾先後與兩名男士行街食飯，但感情生活仍然空白。性格樂天的她前晚到澳門出席《第十六屆全球華語榜中榜影響力大典》時，直言有留意「盛女」話題：「多人講到癲！我都話好似講緊我哋！（包括你？）我諗應該包括。」祖兒冇拍拖不感灰爆，反指外界標籤的「剩女」一詞十分肉酸：「依家我只係待售啫！一啲都唔灰心，希望在明天！」提到無綫有意開拍星級版《盛女》，她也表示有興趣：「呢個話題點解咁熱烈，就係因為有共鳴，我睇到好投入！（如果要你相睇？）我都想試吓，同治療師傾吓偈，聽吓有咩改進嘅地方。」
小儀寧做「性女」
另一年屆41歲的「剩女」小儀，昨日出席戶外活動亦被問起剩女話題，她直言近期喪煲《盛女》，更錄低翻睇！問到會否自覺是「剩女」，小儀即笑說：「我係性愛個『性』！（好多性史？）未夠，要儲吓。（擇偶條件？）有男人性『精』就得，我係好主動同好進取。」但她直言不會參與星級版《盛女》：「我已經算係圈中人，畀人感覺好假。」
至於五位「盛女」，自節目出街後日日被網友狂踩，更有報道將她們起底！據知，有「盛女」終於不堪壓力紛紛避走，甚至拒返工，當中包括Suki與Bonnie！Suki與男友出走外國，Bonnie亦索性不上班，並Book定機票離港。自信心十足的39歲會計師Florence，因節目而慘被公司高層照肺，要求她停薪留職，有工冇得返！據消息指無綫原定邀「盛女」於未來兩個周日出席《盛女駕到》直播節目，但全打退堂鼓，無綫惟有改邀人生導師等專家頂上。另有傳參加者Mandy做媒上節目，因她與編導岑應相識，據知兩人雖相識，但毫無利益衝突，因節目沒有獎金獎品。
一班女仔原本欲藉節目擺脫剩女行列，如今搞到一身蟻，更有人承受壓力下要接受心理輔導。《盛女》監製衞世輝說：「佢哋畀人插非無綫所預料，我都好同情佢哋，但節目到依家未知點做。（擺五女上枱？）絕對冇，只係其他報道造成佢哋咁樣！」
網友嘆自我高估
自無綫節目《盛女愛作戰》出街以來，網友對節目議論紛紛。
網友kiman618：39歲Florence從事會計，理應好清楚自己Position及Depreciation，但佢心目中往往高估自己個Market Value！
網友botwf：Mandy，女強人，要經常以強勢姿態出現，我倒認為一係一個小男人反而可能會適合佢。
網友jake68：Suki要增肥先，搞好啲精神，太過病樣了。
網友皮甩士：畢竟悲劇人物，先可以發揮到人類最大創意。其實Florence姐點解咁悲劇？我覺得佢悲劇在於「不可自救」。
