召集天華嫂組大婆聯盟 采兒對付小三「買兇殺夫」
[轉載/Youtube] 應采兒早前在微博公開擊退老公陳小春的疑似小三，連小春事後都聲聲怕了老婆獅哮功。應采兒前晚在銅鑼灣出席時裝品牌活動時繼續笑言如老公真有小三，會不惜買兇殺夫；又得戚表示要成立大婆聯盟，盟友包括謝天華老婆。日本女裝品牌A.T by Atsuro Tayama 30周年紀念，前晚在銅鑼灣慶祝及舉行2012春夏時裝騷，模特兒Alice B.、Cara G.、甜美Canon女Madi Ross等行騷，應采兒、蔡卓妍（阿Sa）和Yumiko等睇騷。
「我有呢個權利」
應采兒早前大發雌威，在微博發功擊退老公陳小春的疑似小三，她前晚風騷非常：「咁未去到有小三嘅階段，但我要早一步預防囉，多謝微博力量，多謝幫我forward出去嘅女藝人，真係嚇親我老公。不過家啲女仔係好主動出擊，唔會理對方有冇結婚，唔係咁易殺得退，更加唔會知難而退。」
之前小三疑似人選包括內地女星江雨霏等，應采兒說：「唔係藝人嚟，都唔係之前傳嗰啲。」記者指她發揮大婆威力，她開心得戚說：「我有呢個權力！」她指小春一向乖，但不應主動給電話號碼其他人。如果小春真有小三，問應采兒如何對付？她即笑說：「死人囉！佢應該會死！全家都會一齊死，我畀錢，唔係，係用佢嘅錢搵人殺咗佢！」
應采兒笑言要組織大婆聯盟，盟友有謝天華太太、未婚的胡杏兒、楊冪等，更大笑指將來要上市。問她可會生B趕絕小三，她即說：「未生都唔可以有小三啦，呢排都唔得閒生仔！」
阿Sa撐男友召妓
此外，阿Sa被問到尋歡電影《東莞的森林》傳有意搵其男友陳偉霆（William）做男主角，阿Sa說：「我就係東莞人喇，都冇聽過呢本小說。」網民指陳偉霆接拍，有助開拓人氣，阿Sa即表示歡迎：「搵佢都好，好機會！」戲中有召妓等情節，她說：「幾搞笑喎！」不過，阿Sa相信男友沒有尋歡經驗，自己也信任男友。
