遭無綫梳頭阿姐歧視 李家仁冇粉用髮真火
[轉載/Youtube] 小明發火，非同小可。憑一曲《小明上廣州》走紅的李家仁醫生，日前為無綫拍攝兒歌MV，欲使用令頭髮出鏡時顯得濃密的增髮纖維粉時，沒料到遭人一口拒絕，又暗嘲兒童組一向不受重視，令李醫生大動肝火挺身向高層投訴。本報接獲消息，本月11日李家仁醫生到無綫錄影兒童節目《放學ICU》，在整理頭髮期間，李醫生要求當值髮型師在頭髮上灑小許增髮纖維粉，令出鏡時頭髮看來濃密些，沒料遭拒絕並暗嘲兒童組一向不受重視。李醫生有感受辱及為兒童組抱不平，遂向無綫高層投訴。
戲劇組大晒
日前記者致電李醫生求證，他承認說：「嗰日我拍兒歌《小明做特首》MV，我問有冇黑色嗰啲粉（增髮纖維粉）用，嗰位阿姐話：『冇，嗰啲係戲劇組嘅。』我同佢講我以前都有用，佢就一味話嗰啲係戲劇組嘅，我問佢點解以前有呢？佢就話係戲劇組用剩……我心諗，點解咁樣嘅大佬？我又唔係戲劇組，又唔係TVB僱員，我只係話畀你聽我以前有用，你唔畀咪算囉！乜都係戲劇組，不如淨係戲劇組先至准用化妝間！」
李醫生越講越勞氣：「我想問係咪戲劇組請你？定係TVB請你？點解咁樣對個嘉賓？如果我都係咁樣對待，其他兒童組嘅小朋友、同事咪仲難堪？所以我要話畀監製聽就係咁解，畀啲高層知吓，呢個阿姐唔係第一次咁嘅態度。」記者昨日致電《放學ICU》監製曾廣平了解，他說：「仲了解緊，仲未有result出嚟。」
