寶藥黨闖記者會 說服力低過政客
逾七成白領用腦過度
香港人習慣節奏快，工作時間又長的生活，但這對人腦會帶來很大負擔，港大一項調查發現，超過七成受訪的白領一族因為用腦過度，經常在工作中出現不能集中精神及反應緩慢的情況。
[轉載/Youtube] 如果香港要有一個執政黨，八方覺得好可能會係「寶藥黨」。寶藥黨黨員遍佈各行各業，由最近喺政壇呼風喚雨嘅振英哥、夢熊哥，到喺街邊呃阿婆睇神醫嘅二打六，甚至喺平時開記者會嘅乜乜個案，都好適合加入寶藥黨。八方噚日喺一個sell雞精嘅記者會，就撞到一位疑似寶藥黨員「壓力哥」。「壓力哥」曾喺唔同嘅健康產品記者會做「畸士」，要乜事就有乜事，大家真係要認住呢位奇人異士呀！「熱氣哥」變身「壓力哥」
話說噚日有個關於港人開OT導致腦功能下降嘅記者會，公關仲安排咗一位從事廣告行業嘅「腦功能下降個案」鄭文達先生接受訪問。呢位鄭生猛講佢點樣受OT折磨，試過連續返工54個鐘，又試過連續32日冇假放，搞到精神唔集中，「連飲水都斷片」，瞓覺都補唔番，真係要幾陰功有幾陰功，所以佢會考慮飲補腦營養飲品喎。
八方覺得呢位「壓力哥」鄭生好面善，見佢同司儀對答如流，要乜有乜，好似背咗稿咁款。八方諗吓諗吓，先醒起呢位「壓力哥」喺一年半前，喺同一間公關公司搞嘅記招出現過。當年另一贊助商想sell凉茶產品，咁呢位鄭生嘅身份係「熱氣哥」，佢話自己幾乎日日打邊爐，好鬼熱氣搞到流晒牙血，亂飲凉茶搞到頭暈暈，所以會考慮試吓嗰隻虛火實火都啱飲嘅凉茶新產品。
八方再諗吓，又醒起呢位「熱氣哥」，09年曾經組隊大聲嗌，錄得131.6分貝破世界紀錄，咁好中氣，唔似熱氣，更唔似會「飲水都斷片」喎。間公關公司咁搞法，真喺有啲假囉，說服力仲低過振英哥同一眾江湖大佬呀！
