2012-05-05
[轉載/Youtube] 泛民拉布兼集體離場，暫時阻止咗極具爭議嘅替補機制法案，為立法會歷史寫上重要一頁。成就呢頁歷史嘅，有泛民，有保皇黨，亦有港鐵。話說一年到晚講「唔好意思」講到收唔到口嘅港鐵，西鐵線噚日朝又發瘟，大量受阻嘅乘客當中，有趕住去立法會嘅工聯會議員王國興。被困西鐵個幾鐘
立法會噚日朝本來要繼續審議替補機制法案，但係泛民話明離場抗議，剩低嘅保皇黨議員就要死守議事堂，避免會議唔夠半數要流會。人算不如天算，以捍衞政府權益為天職嘅保皇黨議員，基於各種不可抗力嘅騎呢理由，紛紛甩底。
其中甩底甩得最誠懇嘅，非王國興莫屬。佢話西鐵故障期間，佢正正搭緊西鐵，被困個幾鐘，所以趕唔切返立法會勤王，於是港鐵上身，猛對住傳媒鏡頭話「唔好意思」。
其實王國興又使乜唔好意思？立法會流會，佢哋慣㗎喇。想當年，中共前總書記趙紫陽離世，泛民喺立法會動議為佢肅立默哀一分鐘，點知保皇黨玩杯葛集體離場搞到流會。近啲嘅2010年，泛民五位離職發動公投嘅議員正想宣讀聲明，保皇黨又拉隊走人，再次流會。
原來泛民今次都係跟陳鑑林、劉江華之流嘅保皇鬥士學嘢，係屬於二次創作嘅惡搞，禮義廉政黨應該入稟法庭告泛民抄襲。講番甲級戰犯王國興，萬一俾阿爺插佢護主失職都係自己攞嚟，五年前立法會審議兩鐵合併同「可加可減」機制，佢都有份投贊成票。
