內地歌手未熄火 向酒店索償
女星未驚完 薩頂頂聲都沙
[轉載/Youtube] 內地一班歌手為演出一連三日喺維園舉行嘅「世界和平祈禱大會」，被主辦單位安排住喺北角嘅港島海逸君綽酒店，前日凌晨酒店發生三級大火，火海逃生嘅王蓉、薩頂頂噚日如期為活動演唱。喺火海逃出生天嘅薩頂頂同王蓉噚日猶有餘悸，齊齊聲討酒店唔負責任，要求酒店作出賠償同道歉，王蓉投訴酒店：「主辦單位安排了我們搬去Park Lane酒店，三十多小時，酒店沒派代表跟我們聯絡溝通。」
要求酒店道歉
火警喺前日凌晨發生，酒店直至前晚六點先放人返房，搞到所有人都冇衫換，唔能夠出席前日嘅活動，入住第二間酒店嘅差額仲要自己負責。
薩頂頂亦話：「火災後，一直都是大會照顧我們，靠自己幫自己，雖然今次是意外，酒店處理十分不當，酒店應負責任，及向大家正式解釋和安撫，而且還要向大會及受害的住客道歉及作出應得賠償。」
王蓉腳軟痠痛
王蓉喺火警發生後，攞住行李喺兩分鐘內跑十幾層樓梯逃生，搞到雙腿又痠又軟，而薩頂頂係最早發現火警，不停大嗌叫住客疏散：「有火呀！快走！」搞到噚日把聲沙晒。王蓉力斥酒店處理不當影響香港國際形象。
翁虹同老公同個女當晚都係酒店住客，跑樓梯逃生，到前日酒店解封後，先攞番啲行李趕飛機返北京，翁虹前晚返到北京，噚日繼續出席活動，疲累嘅佢喺微博呻小腿仲痠痛。
