艷照出土 怕遇黎明 舒淇避賀劉偉強牛一
[轉載/Youtube] 前晚是劉偉強的 52歲生辰，每年劉偉強都會在西貢匡湖居遊艇會內舉行生日派對，前晚他廣邀一眾藝人好友到場同度生日，當中包括黎明、黃秋生、余文樂、鄭伊健、吳鎮宇、謝天華、葉童夫婦和莊文強等。葉童夫婦準時黃昏 6時半就現身，比壽星仔更早到達，之後劉偉強單拖出現，並入內招呼好友，黎明於 7時半蒲頭，不過黎明僅逗留半小時就匆匆走人，但離開時獲劉偉強親自護送，黎明也與他擁抱及講生日快樂。
劉偉強接受訪問時自言生日願望是大家健健康康，他說：「身邊朋友嘅健康都有唔好消息，所以覺得搵錢都係隨緣。」由於前晚不見與他交情不淺的舒淇現身，最近舒淇是非纏身，在微博被人翻舊帳重貼其艷照，加上其舊愛黎明前晚也在場，即時令人揣測她是避見舊愛，不過劉偉強就為舒淇解畫說：「佢拍廣告，所以冇嚟。」而劉偉強的太太及子女及後也現身生日派對，劉妻更冧笑表示已經送上自己及子女給老公做禮物。
一身牛仔服飾出現的秋生一見記者，即打趣笑指自己打扮似乞兒，他透露送上一支靚酒做賀禮，他說：「都唔記得嚟咗幾多年，由黑頭髮嚟到白頭髮，我祝佢連生貴子，三年抱兩，今日我嚟插牌（即撈），如果唔係名導演鬼得閒嚟，下星期我去台灣，參加反狗仔遊行，講笑啫，我態度咁鮮明，見一隻煲一隻。」
余文樂前晚一見劉偉強即飛撲攬住他，劉偉強更抵死扮樂仔在《春嬌與志明》中演繹王馨平《別問我是誰》 MV時的蝴蝶手，樂仔自爆最難忘是導演當時搵他這個「躝癱」拍戲。
