主持怪談甩轆 Cammi被彈恐怖過鬼
[轉載/Youtube] 謝芷蕙（Cammi）經常被稱為女版張學潤（Nel Nel），近日Cammi同Nel Nel以「父女檔」頂替梁思浩做有線節目《怪談．靈搜奇》主持，佢哋只係主持四星期，但啲《怪談》粉絲就唔多滿意，日前睇完「父女檔」主持後，即喺有線嘅怪談討論區狂鬧。網友籲罷睇
啲粉絲主要針對首次做主持嘅Cammi，除咗大彈佢表現差狂食螺絲，又話佢一開場就話自己係基督徒，點知又講自己見到啲怪異事件，但佢講嘅怪異事件竟然係話坐的士時隔籬架車開得快到見唔到個司機，連自己眼花花都當見鬼，真搞笑。有網友笑Cammi把聲恐怖過鬼，又話佢作狀、細聲、唔識講嘢同唔專心等等，仲有粉絲喺有線個網話「Cammi做幾多集，就罷睇幾多集！贊成留個言，等有線知道有幾大件事！」
對於被鬧爆，Cammi噚日喺電話中呼寃：「第一次做《怪談》，又第一次做live主持，有啲緊張，其實每個人都有第一次，希望觀眾可以畀時間同機會我改進。」
