蘋果放蛇 記者「受虐」痛到叫 古怪中醫吊高病人打
[轉載/Youtube] 一名自稱滿族後裔的註冊中醫，以獨門「吊高嚟打」醫術治病惹起爭議。《蘋果》記者放蛇佯裝咳嗽，即遭吊高用鎚仔狂敲脊椎，事後還被游說鐵版神算及扶乩，實行治病算命一條龍。有脊醫警告亂打脊椎，隨時變癱！該騎呢中醫羅道邦（約40歲）有註冊中醫資格，是中華中醫師公會理事長，自稱滿清愛新覺羅氏後裔，其自創療法專治癌症、中風等棘手疾病，醫館「香港國際中醫院」設在油麻地。
讀者譚小姐（化名）早前久咳不癒往求醫，「諗住睇感冒啫，點知個醫師講到我脊骨有事，結果畀人吊起嚟打，仲要用鎚仔打！之後醫師仲話幫我算命㖭，真係奇聞」。
左手鎚右手棍扑腰椎
記者日前佯裝久咳不癒前往求診，羅道邦替記者把脈及檢查喉嚨後說：「你長期咳嗽喉痛，主因係頸椎錯位、令頸神經受壓所致，好容易復發。」他要求記者左右扭頸至90度時，便指病情嚴重，建議進行脊療，原本診金連藥費300元，只要加300元，便可接受原價900元的脊骨療程。
記者答應後，羅即從天花拉下狀似救生衣的背心叫記者穿上，然後鎖緊定位，按掣吊起記者，離地約五吋。記者驚魂未定，他便左手握鎚、右手持棍說：「會有少少痛㗎，忍住！」隨即以棍尾頂着記者頸椎位置，用鎚仔敲向棍頭，一直沿着脊骨往下扑，及至腰椎位置。雖然用力不大，但因敲打部位屬神經要害，記者痛得直叫。他又叫記者雙腳垂直，前後擺動，動作如盪鞦韆，狂打約五分鐘才將記者放下。
執藥期間，羅又向記者說：「傳統中國醫術離不開醫卜星相。以前中醫會幫重症病人睇八字，算到冇得醫就慳番啖氣。今日有緣，不如我幫你哋睇吓？」說罷即替記者「起命盤」問事，索價300元，還說在道館另設扶乩占卜，每問一事收費100元。換言之睇病占卜一條龍，埋單至少1,000元。
記者其後往對質，羅為鎚骨療法辯解，「呢種療法係我自創，用咗30幾年，有危險一早出事啦！我要睇完病人Ｘ光片，先決定係咪幫佢做」。他又直認「看病占卜」一條龍：「『道』同『醫』關係密不可分，好似心肝脾肺腎，點解同金木水火土五行有關？上年紀中醫一定識占卜睇相，不過我只會幫熟客算命，玩吓啫！」
