人算不如「天」算 測特首拆招牌
[轉載/Youtube]風水佬未必可以呃你十年八年，全城相士早前預測特首選舉賽果，結果幾乎全部被拆招牌，由冇乜相士睇好嘅狼振英「登基」，最多人貼嘅唐豬不幸落馬。八方娛樂組嘅同事喺上月底搵過17位相士預測，有10位買唐豬會贏，得4位睇好隻狼。曾鈺成都有兩票，李居明投畀葉劉，最快「墮馬」。「造馬嘅，點預測喎？」麥玲玲當日話唐豬下巴開闊有力，福星照可做特首。唔通又睇錯羅庚？佢噚日解釋：「佢（振英哥）有咁大後台喺背後出手，真係人算不如『天』算。」雖然衰咗，玲玲企硬話依書直說，狼生個八字及面相都非特首之選，「佢真係面相太單薄，俾佢做咗特首都辛苦過人，社會都多問題啲，真係要考慮移民瓦努阿圖。」
一個賴天一個賴地
貼「唐」嘅區仲德都死撐：「佢（梁振英）嘅八字冇可能做到特首喎，會唔會佢公開嘅出生日期係假㗎？」咁夠膽質疑地下黨員嘅誠信？「如果唔係假。咁就係地運幫佢囉。」佢話除咗人和，仲講天時地利，「成個中國咁大去幫佢，佢條命係點，都做到特首啦」。
well，一個賴天一個賴地，被拆招牌嘅仲有吳佩孚、司徒法正等，李丞責日前就賴當日冇狼英正式八字，只係憑人名去睇。
不過，李丞責細佬李星瑭似乎勁過佢，係少數測中嘅風水師。其他測中嘅包括玄學家鄭智恒、星座專家兼藝人車婉婉、塔羅牌專家楊志紅；西洋玄學佔咗一半，背負中國幾千年歷史嘅風水玄學家，唔該爭氣啲啦。車婉婉當日認為獅子座嘅梁振英有領導風範，但佢噚日透過公關話唔想再回應。
賽後總結，究竟邊個最靈？八方話，一定係車公。今個農曆年初二，車公畀咗第廿九籤中籤大家，籤文是「何為邪鬼何為神，神鬼如何兩不分，但管信邪修正外，何愁天地不知聞。」狼英就係舊曆七月十四鬼節出世嘅，仲唔係邪鬼?
