金像獎前哨戰 Shiga長腿鬥千語事業線
[轉載/Youtube] 今屆金像獎各大獎項將於明晚揭盅，雖然影帝、影后，男、女配角均競爭激烈，但兩位角逐「最佳新演員」的連詩雅及吳千語也火藥味濃，作最後衝刺試戰衣時，更分別以大露背及事業線迎戰，率先來個前哨戰！明晚舉行的《第三十一屆香港電影金像獎頒獎典禮》，影帝估計是姜文及劉青雲之爭，影后方面葉德嫻坐定粒六等上台，最佳男、女配角入圍者均超班，既有影帝謝霆鋒又有影后劉嘉玲，兩人更被睇高一線。
睇好鄭爽獲獎
而角逐「最佳新人獎」的連詩雅（Shiga）及吳千語（Karena），分別憑《喜愛夜蒲》及《開心魔法》入圍，早前兩人談及心水得獎人選時已互當透明，估不到兩人分別試戰衣，也要先來一個前哨戰，Shiga以Hugo Boss白色雪紡連身大露背裙上陣，盡騷滑溜玉背及42吋長腿，名副其實影「後」，Shiga透露近日心情緊張以致失眠：「到時同媽咪、契媽一齊去，媽咪都好緊張，但我都唔敢食嘢減壓，反而係咁做Sit Up同Gym，又做背部磨沙，希望聽晚以一個靚靚線條畀大家睇。（勝算？）正常心態，反而期待見偶像葉德嫻同劉青雲，驚自己會忍唔住去影合照。」
另一邊廂，吳千語邀來時裝設計師Cecilia Yau助陣，Karena在店內挑選多條露背、露肩及低胸晚裝裙，對粉紅色露肩露背長裙情有獨鍾，但穿上後不太稱身，其後再試另一條粉紫色低胸裙，而裙的下身更是透視，谷胸的她淺露「事業線」搶「峰」頭，兼玩透視誘惑，絕不讓Shiga專美！Karena揀了三套戰衣，她感激老闆黃百鳴送上戰衣，當作獎勵她入圍。
Karena坦言看好鄭爽得獎：「佢之前拍過電視劇，入圍者中實力最高，我同Shiga始終係新丁。（爭獎火藥味濃？）獎項呢啲嘢冇諗咁多，睇評委揀邊個啦！唔輪到我去管，我同Shiga係識，但唔係好熟，工作上見面居多。（覺得Shiga演成點？）角色OK，做得好放，有勇氣先做到。」
吳千語 Karena
年齡：18歲（1993年10月27日）
三圍：33、23.5、34
連詩雅Shiga
年齡：23歲（1988年6月29日）
三圍：33、23、34
